الخميس 19 سبتمبر 2019 الموافق 20 محرم 1441
العدد الورقي مجلة طلع النهار
فوزي سعدة
فوزي سعدة

عادى

السبت 07/سبتمبر/2019 - 11:35 ص
طباعة

كلمة كل يوم بنقولها لبعض، مالك فيك حاجة أبدًا "عادى"، حد زعلك أو وجعك وقالك حاجة غيرت مزاجك؟، لا مفيش حاجة حصلت "عادى" ياجدعان، ده الطبيعى بتاعى هو فى حاجة متغيرة فيا ولا ايه؟ "عادى" ده بيكون الرد على أى إنسان بيسألنا عن حالنا، أو فينا حاجة متغيرة، ده حتى لو فى أى شىء جديد حصلنا فى حياتنا، بنستغربه فى الأول، وايه اللى جابه قدامنا فى التوقيت ده بالذات، وبعد كده بتعود عليه ويبقى شىء "عادى" ونتعود عليه، يبقى "العادى"، أو الطبيعى هو الشىء بنتعود عليه، وما يلفتش نظرنا إنه حصل فيه تغيير، يبقى غير العادى هو الحاجة الجديدة علينا وبتلفت نظرنا لما بنشوفها صح كده، ولا أنتم شايفين ايه؟، يعنى دلوقت الناس أصبحت ما بتبقاش على العيش والملح، وده بقى "عادى" بالنسبة لأى حد فيهم، وأصبح غير "العادى" هو اللى باقى على العشرة فيهم، وبرضه بقى "عادى" الناس تعرفك علشان مصلحتهم، ولما تخلص المصلحة وما يبقاش فى حاجة هاياخدوها من وراك، يبيعوك فى أى موقف ويشوفوا غيرك، علشان يستفادوا من معرفته ليهم، وده بقى شىء "عادى" ولما تشوف حد منهم وتعاتبه هو حصل ايه؟، يعمل فيها عبيط، وكأن مفيش حاجة حصلت؟، مش ده اللى بيحصل ولا محدش شايف معايا كده؟، علشان كده إياك توذئ نفسك بالصبر على علاقات كثير فيها الشد والجذب، كثيرة الاستفزاز، كثيرة الوجع مليئة بسوء الظن، وأخرتها تعيش عمرك تجرى وراهم للتبربر وإثبات براءتك من إتهامهم لك، على التقصير فى حقهم، زى بقى من "العادى" إن المال محدش بيورثه إلا بعد وفاة مورثهم، إذا المال هو إرث الموتى، وقالولنا إن الحب هو ميراث الأحياء، بس لو حد يعرف حد ورثه على حياته؟، ياريت يدلنى عليه علشان نتعلم منه ماشى، طبعًا عمرنا ما شفناه قبل كده، ونرجع ونقول التاريخ لا يعيد نفسه، بس الحقيقة إن الإنسان هو اللى بيكرر غبائه، صدقونى دلوقت لما بنشعر بأى تعب بنتمنى إننا نرجع ونبقى "عادى"، شوفتوا بقى إنه قد ايه "العادى"، بقى نعمة كبيرة وإحنا مش حاسين؟، فالصح دلوقت إنك تشق طريقك فى الحياة بنفسك، حتى وإن شق عليك ذلك، ولذلك لو كل الناس عرفت انت رايح فين، عمرك ما هاتوصل لهدفك أبدًا، فالأحسن من كده إنك تسيبهم فاكرينك تايه فى حياتك، وده هو "العادى" اللى وصلناله، تصدقونى لو قلت إن الواحد أصبح قبل ما يعمل أى حاجة جديدة فى حياته، بقى لازم يسأل نفسه السؤال ده، استخبى وانبسط، ولا اتفشخر واتحسد؟، "العادى" فى حياتنا أصبح صعب نعيشه بسهولة، أقولكم الواحد أصبح بالحكمة اللى بتقول "خليك بعيد تعيش سعيد، تقرب من الناس النكد يزيد"، ويبقى ده هو "العادى" اللى لازم نتعود عليه، مش كده ولا ايه؟

ads
ads
ads
ads
ads
ads
ads
ads
ads