الإثنين 26 أغسطس 2019 الموافق 25 ذو الحجة 1440
العدد الورقي مجلة طلع النهار
فوزي سعدة
فوزي سعدة

لو عملت غلط

الإثنين 22/يوليه/2019 - 05:42 م
طباعة
لو فى يوم عملت أو مشيت فى غلط، ما تفكرش إنك لما تحب تعمل الصح هتلاقى الموضوع سهل، لازم ساعتها تراجع حساباتك وتسدد الفواتير المتأخرة عليك، وعند الحساب برضه ساعتها هتلاقى نفسك خسرت حاجات كثيرة حلوة فى حياتك، مكنتش واخد بالك منها، وهايضيع من عمرك كثير تدفع فواتير الغلط ده، علشان كده لو فى يوم ركبت القطار غضبك أو الفعل الخطأ، حاول تنزل فى أول محطة، لأنه كلما زادت المسافة، زادت تكلفه العودة، علشان دائماً كنا بنحذر إنك ما تجرح مخلوق خصوصاً اللى بتحبه، ساعات الجرح بيكون بالكلام، دائماً خلى الكلام الحلو على لسانك، علشان الكلام الحلو بينور الوشوش، ويفتح النفس، ويحسس الواحد بقيمته، ويخليك عايز تجيب حتة من السماء للى قالهولك، والكلام الدبش حتى لو بصيغة هزار بيخسف الروح المعنوية لتحت سابع أرض، وبيأكل فى النفسية، وينقص غلاوة اللى قاله مهما كان، إحنا عارفين إن العمر قصير مهما طال مفيش وقت، يبقى الكلمة الحلوة هى أهم وأغلى وأسهل حاجة تتأخد أو تديها لحد، ودائماً حاول تقعد كل فترة مع نفسك وتواجها بأخطائك، وتقيم أفعالك وأعمالك مع اللى حوليك أو بتتعامل معهم، وحاسبها أول بأول، علشان الناس لو باعت ما بتشتريش تانى، مشكلة الواحد فينا انه بيعشم نفسه إن العلاقة هاتستمر على رصيد بتاع زمان، ميعرفش إن كل مرة الناس بتعديله غلطة، كانت بتاخد جزء حلو من قلوبهم معاه ، والواحد بيفضل يتناسى وهما يعدوله، بيفضلوا يعدوا، لحد ما فجأة تخلص كل الحاجات الحلوة اللى كانت ليه عندهم، وهنا بتبيعه بأى ثمن علشان ماتعش على جرح صعب يلم تانى ، ولما تحاول تصالحهم وتقول للواحد فيهم إنت زعلان مني فى ايه؟، يرد عليك ويقول أنا بطلت أزعل لأن مبقاش فيا طاقة للزعل، وبطلت أقول رأيى لأن مبقاش فيا حيل للنقاش، أقولك أنا بطلت أى حاجة هاتوجع دماغى، طب قولى فى ايه حصل، الرد إحنا ياما زمان عملنا علشانك البدع، وأخرتها ملاقناش إلا الوجع، والأدهى من كده إن برضه ما بيكونش حاسس بمدى الجرح اللى عمله، فواحد من حبايبه اللى لسه باقى على العشره لما يحب يسأله، انت ما بتتعلمش من أخطاءك؟ يقول لأ بتعلم، طيب بتكررها تانى ليه؟، أصل دائماً بحب المراجعة، وبحب دائماً أراجع اللى اتعلمته، برضه بياخدها بتهريج ومش دارى بالوجع اللى بيعانى منه المجروح ،  طيب ياريت تاخد عظة وتبعد عن الحاجة اللى الحبايب بتزعل منها، علشان ما ترجعش تشتاق للماضى وتقول ياريت ، أصل أصعب اشتياق ياصديقى إنك تشتاق لنفسك القديمة، ضحكتك القديمة، حتى لقلبك القديم، ودائماً خلى عندك قناعة باللى ربنا أدهولك، علشان حلوة القناعة اللى تخليك شايف كل حاجة بتحصلك خير من عند ربنا، وفى النهاية أحسن كلمة ممكن تسمعها من حد عزيز عليك، هى إنك تصالح حبيبك وهى "ما هانتش عليا"، أصلها كلها حب، ما هانتش عليا أروح من غيرك، ماهانتش عليا أسيبك زعلان علشان بحبك، أقولكم ربنا يكرمنا كلنا بالناس اللى ما نهونش عليهم.
 

ads
ads
ads
ads
ads
ads
ads
ads
ads