فوزى سعدةيكتب..انتى جايه اشتغلى ايه..؟                              

لما سألته السؤال ده رد وقال “سواقة يا هانم”.. أهو كلمنا النهاردة عن تجربة قيادة التاكسى للسيدات سمعنا وشوفنا بنفسنا التجربة دي فى شوارعنا.. أشهرها التاكسى البمبى.. طبعاً طبيعة الإنسان فى أى جديد بيرفضه لغاية ما يتعود عليه ويصبح الوضع طبيعى بعد كده.. الطبيعى أول ناس ترفض الموضوع سائقو التاكسى فى نفسهم يقولوا دول جايين يقسمونا لقمة عيشنا.. هى العملية ناقصة.. ومن الطبيعى يطاردوهم فى الشوارع ويغلسوا عليهم.. ويسمعوهم كلام كتير.. إحنا علينا أقساط عايزين نسددها.. إنتم المفروض تقعدوا فى بيوتكم تربوا العيال.. إنتم عربيتكم ملاكى وإحنا أجرة علينا مصاريف ومخالفات كتير مش زى ما بتدفعوا إنتم.. الأحلى كمان إن أولاد وآباء السيدات يبدون استغربهم من صوره ماما.. يعنى الولد الصغير يقولك ماما شغالة أوبر.. هنادى ماما بعد كده وأقولها يا أسطى.. والأب يقولك فى نفسه عشت وشوفت بنتى بقت تاكسجية.. فين بقى على ما الناس تأخد على كده.. يا جماعة محدش عارف ظروف التانى.. مش معنى إن السيدة من دول راكبة سيارة.. يبقى معاها ومش محتاجة تشتغل كده.. طب ليه ما يكونش السؤال هى ايه اللى يخليها بتبهدل نفسها فى القيادة فى الشارع؟ والتعامل مع الجمهور والتعرض في بعض الأحيان للنقد والاستهانة بها.. وطبعاً غير مضايقة المرور وسحب الرخص بحجة إن الشركات المنظمة لعمل سياراتهم حتى الآن لم توفق أوضاعها.. والأهم من كده إن بعض من الزبائن ممكن يستضعفوها على أساس إنها سيدة ويجادلوا معاها سواءً فى الأجرة أو مكان الوصول.. وأنا مسجلة فى الكول سنتر إنك توصلينى كده هناك مهما كانت المنطقة قريبة أو بعيدة.. وماليش فيه الشوارع سليمة أو مكسرة أنا عايزة أوصل والسلام.. ومشاكل كتيرة بتقابلهم وكالعادة السيدات أصحاب التجربة بيعدوها ويستحملوا زى ما بيقولوا “أكل العيش مر”.. يا جماعة مفيش سؤال خطر فى بالكم له السيدات بتخوض التجربة دي ليه؟!.. الإجابة “الحاجة وحشة”.. فى منهم زوجها مات وأصبحت أرملة ومسئولة عن أطفال صغيرين وهى عايزة تربيهم.. فى منهم اللى زوجها انفصل عنها واتجوز غيرها والمصروف اللى بتخده مش مكفى عيالها.. منهم اللى قاعدة بمفردها تحت أى ظرف فبالتالى بتشغل وقت فراغها بدل القاعدة فى النوادى والخوض فى كلام الناس والقيل والقال.. غير كده من الأسباب اللى دفعتهم يعملوا كده.. تعالوا معايا نشوف نص الكوب المليان ونسأل نفسنا.. هى الشغلانة دي حلال ولا إيه؟ مش أحسن ما يمشوا فى الحرام والمجتمع يلفظهم وينظر لهم نظرة غريبة ومشينة.. بنتى وبنتك لما يركبوا سيارة مع سيدة وتعاملهم برفق وما يسمعوش منهم شتيمة أو كلام جارح مش برضه ده كويس.. زوجتك وأولادك راكبين سيارة حديثة ومكيفة والسيدة التى تقود بتكون حذرة فى المشى بخلاف جرأة بعض السائقين وإنهم يرموا على بعض أثناء السير وتعرض الركاب للمخاطر.. وبرضه اوعوا تنسوا إن العربيات الموجودة فى الأجرة أغلبها أصبحت شبه متهالكة فلماذا لا ندعم بسيارات جديدة وبمقابل معقول.. أقولكم يا سيدتى صاحبة التجربة ربنا معاكى وكملى طريقك وربنا يوفقك ويعطيكم الصحة والصبر على السخافات التى تصادفكم.. وأول الطريق دايماً صعب.

فوزى سعده  

 

تعليقات الفيسبوك

اضف تعليق