الأربعاء 19 يونيو 2019 الموافق 16 شوال 1440
العدد الورقي مجلة طلع النهار

خلينا صحاب..فيديو جديد لعمرو حسن

الخميس 30/مايو/2019 - 10:55 م
عمرو حسن
عمرو حسن
طباعة

قصيدة خلينا صحاب من كلمات:عمرو حسن

سكريبت :كرو عاشور - أحمد علاء الجندي

تمثيل : شروق فرغلي - آية علي

إشراف:نور إبراهيم

هندسة صوتية وتوزيع : محمد الجريتلي

انتاج : عمرو حسن

إخراج : أحمد علاء الجند

كلمات القصيدة

 خلينا أصحاب

شايفاك انسان طيب حسّاس

راجل ورقيق

تنفع كصديق

لكن ك حبيب

عمري مافكرت

والله ياواد لا هاجيبهالك

عايزين نفرح بقى بعيالك

وبحبك جدا صدقني وجوايا حاجات

بس احنا اخوات

سِكتت وسكت

مشيت ووقفت

وكأن الدنيا بتتحول اسود بهتان

لون انا مش عارفه لحد الآن

وكأن فيه خيط مزيكا حزين

طالع من مطرح واقفتها

هل حبيتها؟

ام ان الامر بحاله سراب

قولتلها انا رافض نبقى أصحاب

ياتكوني معايا يا ماتكونيليش

سكتت لحظة

علشان كانت هي ملاحظه

ان انا مكسور وبهددها

مدت ايدها

مسكت ايدي

وقالتلي خلاص فُك ياسيدي

عازماك على قهوة ماتكسفنيش

كانت عارفه ان الموقف صعب

والصعب حبيبتك تتعاطف علشان تواسيك

فأخدت قرار اني انساها

من يومها وانا بدونها معاها

براقبها بعين عيل محروم

وباقول ماطلبش واكلمها

وافكر هي بتعرف مين

ضحكتها لمين

وباموت لو كانت بصّالُه

أصبحنا لاننفع متصاحبين

ولا عدنا صحاب

وبقينا برغم اللي مابيننا

اتنين اغراب

90% من الأشخاص المكتئبين

بيحسوا حنين لقلوب بتحن لناس غيرهم

الواحد ضَيّع وقت كبير

مع ناس مش شاغل تفكيرهم

هذا التفكير الغير صحي

هو المتسبب في القهوة

في عمر خيرت

وترى جبران

وصداع القاولون العصبي

تضييع 16 ساعه في شات

ودخولك في مشاكل وحاجات

وخروجك منك آخر الليل

هاتروح لطبيب هايبص عليك

وهايكتبلك ادويه للنوم

ومهدئ

ويسيبك تمشي

وهاتفضل برضه مابتنامشِ

وهايفضل جسمك بيعاندك

كل الموضوع انك عندك

متلازمة حب اللي ماحبكش

انت ماعندكش سبب عضوي

يمنع عينك تقفل لساعات

السبب الأصلي في عدم النوم

انها شايفاكوا اتنين اخوات

بالنسبالها

هي بتعشق في اللي قتلها

واللي ماقدَّرش ودخلها

في مساحه كبيره من الإهمال

بتحب جنونه وعصبيته

وتحب تشوفه بيجرحها

وتحب انه مابيكلمهاش

مع انه مكَلِّم ناس تانيين

بتحب عدم غيرته عليها

بتحب قساوته وهي تلين

بالنسبالها ... عمرك ماهاتبقي اللي في بالها

فـ افهم ياحزين

وأعرف دستور البنى ادمين

عمرك بيضيع

والوضع وضيع

والعالم أجمل من غيرها

عمرك ماهاتيجي ف تفكيرها

مع انك شاغل ناس تانيين

وحاططهم في الدايره اياها

خلينا صحاب

داين تتدان

ومافيش مجروح مابقاش جارح

كله بيبحث عن ألمه الخاص

وكأن العشق بدون راحه

كأن الشوق لازمه جراحه

علشان مايروحش لناس ببلاش

ونصيحة ياريت لو كنتوا أصحاب

خليكوا أصحاب

علشان لو قولت على مشاعرك

هاتكون بتضحي بصداقتها

وإن فعلا فعلا حبيتها

استنى عنيها تقول قبلك

و استنى الشوق فيها يقابلك

وساعتها يجوز تمحي المسافات

فيما عدا ذلك

فـ انت هاتسمع

انا اه حباك

بس احنا اخوات

ads