الخميس 17 يناير 2019 الموافق 11 جمادى الأولى 1440
العدد الورقي مجلة طلع النهار
فوزي سعدة
فوزي سعدة

الغلط فين؟

السبت 12/يناير/2019 - 07:44 م
طباعة

ده مش اسم البرنامج الإذاعى اللى كانت الغلطة فيه بخمسة وسبعين قرشا، وكانت بتبقى مسابقة والفائز يقبض آخر البرنامج، دى مسابقة بس من نوع تانى، واللى هايحلها له منى الجايزة الكبيرة، بس ياريت تركزوا معايا شويتين وتجاوبونى بصراحة، ومحدش يزوغ من الإجابة وياريت نواجه ونرد بصراحة، والأمين فى إجابته وعنده الصراحة، هايبقى له برضه الأجر والثواب عند الله، علشان ما نطولش على بعض ونلف وندور تعالوا نبدأ ونقول "الغلط فين"؟ إحنا شايفين فى الشوارع الشباب اللى عامل حملة "امسك متحرش"، وفعلاً بيمسكوا شباب متحرشين بالبنات خصوصاً أيام الأعياد فى الحدائق والمنتزهات والشوارع وأمام السينمات وبيسلموهم للشرطة، وبيقوموا معاهم بالواجب، وبيتكرر برضه المنظر ده محدش بيحرم ويأخد اللى قدامه عظة، يعنى المفروض تتمنع الحركات ده ونخاف على بناتنا ونبعد عن أى شىء يشوه مجتمعنا هانقول سؤالنا اللى بدأنا به "الغلط فين"؟، الشباب ده ايه الأسباب اللى دفعتهم يعملوا كده؟ هل هى طاقة زيادة عندهم وبينفسوا عن نفسهم بكده؟ قاعدتهم طوال الليل قدام القنوات الفضائية ومشاهدة أفلام العرى والرقص وخلافه؟، وسائل التواصل ومحادثاتهم مع بنات وسيدات أو شباب الجنس الثالث؟ قعدتهم على المقاهى والكافيهات والشيشة والمخدرات اللى بتطير العقل هى اللى بتوصلهم لكده؟ أخد المصروف من بابا على ما أشوف عمل يناسب إمكانياتى ومؤهلاتى؟ الفراغ النفسى وعدم التواصل مع الكبار والتقرب للدين هو اللى وصلهم لكده؟ ماشى دى أسباب سردناها عن الشباب وياريت تفكروا قبل ما تجاوبوا علشان تأخدوا الجائزة، وأهم شىء حد يقنعى ويقول لى فعلاً "الغلط فين" علشان مجتمعنا يرتاح من العادات السيئة! بس أنا لسه ما خلصتش كلامى، إحنا مش هانتحامل على الشباب لوحده! برضه فى سبب تانى وهى البنات والسيدات لا مؤاخذة اللى بيقولوا عليهم مشيهم شمال، هما اللى بيستفزوا الشباب ويوصلوهم للحالة اللى بنشوفهم فيها، طول النهار والليل قاعدين فى الشوارع وماسكين الموبايلات الحديثة ويتبدلوا المواعيد مع الزبائن بتوعهم، اللبس الخليع والمياصة وطريقة لفت النظر اللى بيعملوها علشان كل واحدة تخطف الزبون قبل التانية؟ انتشار بيوت الدعارة والشبكات الدولية اللى بتخطط للفساد الأخلاقى؟ زى ما بيقولوا هم يبكى وهم يضحك فى النقطة دى بالذات البنات بتوع البلد مش عجباهم البنات الروس والصينى وخلافه يقولوا لبعضهم هى العملية ناقصة؟ سايبين بلدهم هناك وجايين يزاحمونا فى الرجالة بتوعنا؟ وبعدين السبوبة بتاعتنا بتقل كده كثير مش زى الأول؟ وبوليس الآداب برضه مش سايبنا فى حالنا وكل ما نعمل شبكة جديدة يمسكوها؟ هو إحنا هانلاقيها منين ولا منين ياجماعة؟ إحنا ما صدقنا إن شغل الدعارة اتلغى وبعد عنا، دول عايزين يرجعوها بصورة تانية والغاوى ينقط بطاقيته، والبنت اللى بتنزل من بيت أهلها فى أوقات غريبة بحجة الدرس أو هقابل زميلاتى أو أى حجة ومحدش يسأل عليها؟ نزلت امتى، جت امتى، باتت بره، ومحدش شافها إمبارح؟ الأب مشغول علشان عياله والأم مش عايزة تتعب نفسها كفاية إخواتها الصغيرين ومسئولية البيت؟ زى ما بيقولوا كل واحد فى مواله محدش فاضى لحد؟ تقليد الغرب ومن غير تفكير نعمل زيهم والنتيجة تبقى ايه محدش بيعمل حسابها. هاقول ايه تانى بعد اللى قولته وشوفتوه معايا ايه رأيكم فى اللى بيحصل؟ ياريت بعد الكلام ده كله حد يجاوبنى ويقولى "الغلط فين"؟ علشان أنا نفسى ارتاح وتفكيرى ما يشردش منى ماشى وأنا عند وعدى بس حد يقول لى "الغلط فين".


ads
ads
ads
ads
ads
ads
ads
ads