السبت 23 مارس 2019 الموافق 16 رجب 1440
العدد الورقي مجلة طلع النهار
فوزي سعدة
فوزي سعدة

مش كل البدايات

السبت 29/ديسمبر/2018 - 09:40 م
طباعة

زى ما كلنا عارفين فى حياتنا لكل شىء بداية، ولكل بداية نهاية، ومش كل نهاية لازم تكون سعيدة أو بائسة، وزى ما سمعناها من الكبار كل شىء مكتوب، ممكن يوم تبات مظلوم، ويوم تانى تبات غالب، أهم حاجة القناعة والرضا بالقسمة والنصيب، إحنا علينا السعى واستغلال الفرص المتاحة، بعد كده النجاح والتوفيق من عند المولى، بس أهم حاجة تكون البداية صح وانتظر رد الفعل وتوقع أى شىء علشان لو زعلت ما تزعلش قوى، وبرضه لو فرحت ما تفرحش قوى، أصلها فى النهاية قوى ده بتتعب الواحد قوى تمام لحد كده، بس اللى عايز أقوله فعلاً طول ما إحنا عايشين فى الدنيا هاتشوف فيها ناس علينا عزيزة، وناس عايشة بينا بس خبيثة وناس فى تعاملها معك تحس إنها لذيذة، وأخيراً فى ناس لما تيجى تقدرها متسواش حتى بريزة، بس فى الآخر لازم هاتعدى عليك كل الأنواع والأصناف من البشر، أصل الواحد هياخد الخبرة منين وإزاى؟، ما هو لازم نتعامل مع الحلو علشان لما نشوف السئ نعرف نفرق بينهم، ونبعدهم عن اللى شوفناه فى حياتنا، لاحقاً يبقوا يمشوا فى الحياة ويعرفوا يأخدوا قرارات صح أو فيه ضرر يكون فى أضيق الحدود، ويكون الأذى وقعه خفيف عليهم، وكل واحد رسالته فى حياته إن أولاده ما يتعرضوش للى هو شافه فى حياته، ويكون سبب كبير فى سعادتهم وبعدهم عن ما يضرهم أو ما يجرحهمش أمامه، وفعلاً فى بعض أفعال فى حياتنا كانت بدايتها سعيدة وجميلة، والناس وثقت فى البدايات قوى، وماكانوش عاملين أو حاطين فى حساباتهم إن فى نهايات هاتقهرهم وتقسم ظهورهم، زى مثلاً، هانقول بعض النماذج اللى بنشوفها فى حياتنا وكان اعتقادنا إننا لن نرى ما يشوب حياتهم من حزن وغم، يعنى مثلاً كل اللى اتطلقوا وواقفين فى المحاكم لبعض كانوا عاملين فرح وبيرقصوا فيه، وكل اللى بيعايروا بعض كانوا فى يوم من الأيام أصحاب والمعايرة دى كانت فضفضة وأسرار بيحكوها لبعض علشان كانت هناك ثقة بينهم، وكل اللى شمتان فى ابتلاء عندك كان بيواسيك عليه زمان لما كنتم حبايب، وكل اللى ماشى يشوه فى سمعتك قدام الناس كان بيقولك ويقنعك إن اللى بيتكلم عليك ده غيرة منك يا صديقى، وكل اللى فضحك كان زمان بينصحك وعامل حبيبك وخايف عليك، وكل اللى شتمك كان زمان بيشتم اللى يشتمك ويجيب سيرتك، ويدافع عنك فى غيابك، كل اللى قلب عليك فجأة كان أقرب حد ليك، وكل اللى قال عمرى ما هسيبك، سابك وتركك ونسيك دلوقت، وكل اللى بيحسدك كان زمان بيقولك قول الأذكار كل يوم وربنا يحفظك، كانوا زمان يقولوا الضفر عمره ما يطلع من اللحم، الضفر فعلاً طلع من اللحم والدم بقى مياه، الخلاصة بعد كل اللى حصل وبيحصل قدامنا، مش كل اللى يقولك انت حبيبى تصدقه، ربما صديق اليوم عدو الغد، فالحذر واجب فى حياتنا دايماً، أختمها وأقول، الدنيا مدرسة مديرها الزمن، وأستاذها القدر، وتلاميذها نحن البشر، نتقابل غرباء، ونعيش فيها أصدقاء، وإن حان وقت الفراق، فلا تقل الوداع، بل قل إلى اللقاء.

فوزى سعده

ads
ads
ads
ads
ads
ads
ads
ads