الأربعاء 26 سبتمبر 2018 الموافق 16 محرم 1440
العدد الورقي مجلة طلع النهار
د.مي مجاهد
د.مي مجاهد

عندما ينتحر المنطق

الأحد 09/سبتمبر/2018 - 02:06 ص
طباعة
في يوم من أيام ربنا وأنا مروحة كالعادة لاقيت تجمع كبير لستات كتيرة 
فأنا افتكرت أن في قافلة صحية و لاقيتني فرحانة أوووى أن الوعي عندنا - نحن الجنس اللطيف - بقه هايل كده  .
فقلبي دق عدد مهول من الدقات ودفعني الفضول و دخلت بقلب جامد أسأل واحدة من الفضليات ورسمت ابتسامة غاية في البراءة .
 هو في ايه حضرتك ؟ مجمعين ليه كده ؟
 انتي صحفيه صح ... وزي البرق لاقيتها اتقمصت دورالفنان حسن حسنى وهو بيصحي نيازي وندهت بصوت جاهوري 
يامو حمااااااااادة يامو جناااااا يامو تااااااااامر 
 انا قلقت الصراحه بس خليت ابتسامة البراءة على وشي زي ماهي قولت تعملي منظر
 ولاقيت الفاضلة أم حمادة جت وحواليها عدد كده تقريباً هي البوص بتاعهم
 فقالتلي وهي رافعه حاجب أنتي فانهي قناة أوعى تكون ماسبيرو ملوش عازة يا حببيتشي
 ياحاجه بس افهمك .... انطلق صووت جانبي  لالالاه يامو حمادة بتاعت النهار أنا عارفاها دي انتي مش واخدة بالك )دي واحدة تطوعت لتوضيح الموقف) 
وراحت واخداني حضن مطارات ملوش حل وانا لسه ابتسامتي على وشي بس قلبت على بلاهه شوية .
ودار حوار رائع أنا استفدت منه جدا ً كان مضمونه الآتي : 

- يرضيكي وقف الحال ده منهم لله البعدا 
- قولتلها في ايه بس طيب حضرتك؟ وبدأت أتقمص دور بتاعت النهار اللي معرفهاش اساساً
- هيضيعوا مستقبل العيال و الله ما يرضي حد
- بفزع قولتلها مستقبل العيال لييييه هيقفلوا المدارس ؟
- بصتلي بقرف زي هنيدي في الطيارة كده وردت مدارس ايه و تييييت ايه اللي فيها 50 عيل في الفصل والعيال مش بيفهموا حاجه  ماتولع المدارس كلها على صاحبها .
- هو فعلا العدد كبير اومال مستقبلهم هيضيع ازاي في مشكلة في الكتب ولا عشان النظام الجديد ؟
-  كتب ايه و تييييييت ايه و نظام ايه ياحلوة ولا فارق كتب ولا غيرة ده فلوس وبنرميها على الأرض والله.
- بمنتهي التأثر رديت عليها طب هي المصاريف غالية كده؟
- لأه والله احنا غلابة يا ست هانم فواخدين إعفاء مصاريف .
- اااه طب الحمد لله ده شيئ مضيء وأنا خلاص هعيط في حضن الست اللي جمبي
- طبطبت عليا وهي بتقولي لله متخافيش عليهم ربك كريم ما هما بيروحوا السنتر بعد الضهر ياخدوا الدروس كلها ولا الحوجه للمدرسة 
-  رديت عليها سنتر ....  
- اهً ربنا يكرمة المستر زي الفل إلهي يكرمه ياااارب و احنا من ناحيتنا مبنقصرش وبنديه الفلوس اللي بيطلبها وزيادة 
- سنتر ياحاجه وبتجيبوا الفلوس منين طيب مش كنتوا غلابة من شوية ؟
- لاقيت واحدة باين عليها العاقلة الكُمل اللي فيهم جات قالتلي بكل هدوء... 
- ربك بيرزق الواحد بيشقي عشان عياله وبيطلع اللقمة من بقه عشانهم والله يسترة مدرس الفصل بتاعهم خدهم معاه في مجموعة السنتر .
- رديت ونظرة الامومة بتنط من عيوني ربنا يخليكوا ليهم بس معلش مادام هو هو مدرس الفصل مايروحوا المدرسة أفضل دي حتى من غير فلوس؟ 
- سمعت صيحة استنكار وشهقات التعجب تتعالى وخفت الموقف يتطور لأكثر من كده فحبيت أجود وأصلح الدنيا وأحط التاتش بتاعي فقولت بكل ثقة بس طبعا اكيد السنتر مش زحمة زي المدرسة  

ويادوبك خلصت حروف الكلمة وفجأة 
( نزل من العمارة اللي واقفين عندها عدد من الأطفال وهجموا علينا كالتتار و أنتشروا في أنحاء المكان زي الوروود في الجنانين ( سامحني يارب على الكذب) 

-  إيه ده مين دول ؟؟ وكانوا فيييين ؟؟ نزل ايدك يا بابا من على شنطتي 
- دول العيال خلصوا حصة العربي 
- العربي هو ده السنتر  هاااارسود ليه الحصة فيها كام عيل ياجدعاااان ؟؟ اوعى يا بني ميصحش كده يا أم تامر  من فضلك شوفي تامر.
-  ماهو المستر بيضم التلت فصول بتوع المدرسة يا أبله عشان يفهمهم على مهله .
- على مهله 
- رديت وأنا بقاوم الأطفال كأني بغرق في بحر الساحل الشمالي  طب فين المستقبل ياحاجه في الوحلة اللي احنا فيها دي 
-  منهم لله كل يوم حمله عشان يقفلوا السنتر ال ايه الاستعداد للمدارس بس إيه هما يمشوا من هنا وإحنا نفتحه للعيال من هنا طبعا ده مستقبل العيال اللي حيلتنا هيضيعوه البعدا
-  أنا من غير رد تقريبا من الصدمة 
- فحست أنها كسبت المعركة وكملت بكل قوة و عزيمة 
- ايوة اوومااال ايييييه و لازم نضحي عشانهم وأنا بوجه رساله للريس إحنا وراك ومعاك و مصر هتفضل جامدة رغم كل الحملات دي هنقاوم لآخر نفس و القدس عربية ومحدش هياخد سينا منيينا ولا نتهز وآخر كلمة أحب أقولها ياترامب ياجبان ياعميل الأمريكان وتحيا مصر  
ads
ads
ads
http://www.elkalimanews.com/67799
http://www.elkalimanews.com/67799
ads
ads
ads
ads
ads